Свекрва

Не постојат никакви индиции дека Грција во новата 2012 година ќе ја промени својата стратегија кон Македонија, а изјавите на грчките челници не даваат надеж за скоро решавање на спорот со името. Преодната грчка влада цврсто стои на ставот дека единствено решение  е име за севкупна употреба („ерга омнес“). При ваквиот цврст став, наместо да се бараат решенија за спорот за името кој нема никаква логика,  во текот на оваа година се очекува Грција да ги избегнува сите  иницијативи за директни средби.

Наместо барање на решение на спорот, Грција се обидува да изнајде докази против уставното име на Македонија. За да се оспори правото на „Скопјаните„ да го користат името Македонија и Македонци, Грците  не бираат средства, а речиси сите имаат трагикомични содржини.

Најнов грчки „доказ„ е хитот со поштенската марка на поранешна Кралска Југославија на која е претставена територијалната поделба на тогашна Југославија и имињата на т.н. бановини. На мапата отпечатена на таксената марка се гледа дека територијата на Македонија, Косово и Јужна Србија е насловена како Вардарска. Врз основа на овој податок Грците извлекуваат заклучок дека комунистите на чело со Тито, преку ноќ го смениле името од „Вардарска“ во Македонија, притоа создавајќи  вештачка непостоечка нација. Грчките медиуми, коментирајќи дека паднаа маските на Скопје, го обвинуваат  Тито дека со помош на Русите сакал словенската нација да се прошири до брегот на Егејското море.

Меѓутоа, истите тие медиуми не споменуваат дека во Вардарската бановина се наоѓаат делови од територијата на Косово и Јужна Србија. Дали со тоа им се оспорува правото да ги користат сопствените имиња и дали ако го носи името Вардарска во рамките на тие тогашни граници треба да се додадат и тие „отцепени делови“ ?

Ако ги погледнеме имињата на останатите бановини од тоа време ниту една од денешните држави на Балканот не го носи нивното име.  Така  на пример: Дравска (Словенија), Савска и Приморска (Хрватска), Врбска и Дринска (Босна и Херцеговина), Зетска (Црна Гора) и Дунавска и Моравска (Србија).  Дали тоа значи дека денешните држави треба да си го променат името, според логиката на Грците ?

Европа ова го гледа и молчи. Можеби затоа што служи за потсмев. Но, веројатно молчи затоа што поделбата на Македонија од Букурешт 1913година е нејзино дело, а таа денес неможе да го расплетка јазолот кој го сплете. Но, кој автор и бе се откажал од своето дело. Затоа таа молчи и ги остава Грците да се глупираат. Го нема ниту Александар со мечот да го разреши гордиевиот јазол заплеткан во Букурешт.

Денес кога Македонија се подготвува повторно да зачука на вратата на НАТО, нема никакви гаранции дека Грција нема да постави вето. Но, доколку повторно дојде до тоа, се поставува прашањето дали не е дојдено времето да се побара да се прогласи Букурешкиот договор од 1913 за ништовен ?

Македонија не беше само територија во Отоманската империја, туку политичко-организациона единица. А тоа значи, територија со јасно дефинирана државна целина.  Ако овој принцип Европа го почитуваше при признавање на Грција, Србија, Бугарија и Албанија, можеби е време во контекст на денешните стандарди на Европа, истиот принцип да се примени и за Македонија.

Само враќање на целовитоста на Македонија ќе го пресече гордиевиот јазол во кој Грците ја заплеткаа, Македонија, ЕУ, НАТО и ОН.

Во еден напис на угледното списание Економист од Лондон,  деновиве беше напишано: Кутрата, кутра Грција!