На македонската и европска премиера на филмот кој зборува за проблемот со името и Грција не се појави грчката амбасадорка во земјава, иако беше поканета.

Гробот на Александар Македонски се наоѓа на македонска територија, но не смееме да го откопаме за да не избие Трета светска војна, па се чека на подобри времиња. Ова го изјави Паско Кузман во филмот "Името е име" од режисерот Сигурјон Еинарсон. Кузман, директор на Управата за културно наследство, ова го кажа преку насмевка, можеби и метафорично, но дали навистина го мислел тоа не успеавме да дознаеме, бидејќи во телефонскиот разговор ни кажа дека не сака да дава изјава околу тоа прашање.

Инаку, на завчерашната премиера на документарецот пред полна сала во кино "Милениум" присуствуваа и премиерот Никола Груевски, претседателот Ѓорге Иванов, министерката за култура Елизабета Канческа-Милевска и голем број на амбасадори, филмаџии... На македонската и европска премиера на документарецот кој зборува за проблемот со името и Грција не се појави грчката амбасадорка во земјава, иако беше поканета.

Поради голема заинтересираност, во кино "Милениум" беше најавена и вонредна проекција од 23 часот, покрај редовната од 21 ч. Од денеска документарецот се прикажува во кино "Фросина".