Тихомир Каранфилов

Весникот „Трудова Македонија“ е орган на Македонскиот народен сојуз во Америка (МНС), кој излегува во периодот од 1934 година до 1938 година. Всушност тој преставува продолжение на весникот „Балканско сдружение“. Излегува исто така на бугарски јазик, со одделни прилози на англиски и пак под редакција на Гео Пирински. Подоцна весникот излегува како полумесечник и преставува значајна отворена национална трибина на Македонците од сите делови на Македонија.

Во духот на Резолуцијата на IV конгрес на Македонскиот народен сојуз во Америка, како и решенијата на ИК на КИ и Резолуцијата на ЦК на ВМРО(Об), објавени интегрално во бр. 1 на „Трудова Македонија“, весникот води засилена борба против пробугарската линија на органот на МПО, весникот „Македонска трибуна“. Во таа борба за докажување на вистината, весникот „Трудова Македонија“, во продолженија ја објавува и статијата на Васил Ивановски - Бистришки „Зошто Македонците се одделна нација“.

Весникот „Трудова Македонија“, ги обединува Македонците од сите делови на распокинатата татковина и претставува верен сведок за нивната национална свест и за карактерот и континуитетот на ослободителните стремежи и државотворни идеали.

Најзаслужни за формиеањето  на Македонскиот народен сојуз во Америка и нејзините органи се Георги Николов Зајков или попознат како Георги (Гео) Пирински и војводата Смиле Војданов од охридското село Лактиње. Двајцата, во периодот меѓу триесеттите и четириесеттите години на минатиот век ќе настојуваат да ја обединат македонската емиграција во Америка, особено да ги обединат лицата кои Македонија ја чуствувале за своја татковина и на кои македонскиот национален идентитет им бил света работа.

Во септември 1929 година, Пирински и Војданов  ќе го формираат Македонскиот народен сојуз. На почетокот од илинденци ја формираат првата Македонска прогресивна група, која потоа прераснува во Македонски народен сојуз во САД и Канада (подоцна Македонско-американски народен сојуз во САД и Канада), со Централен комитет.

Во 1931 година, Војданов бил избран за претседател на ЦК на Македонскиот народен сојуз, а Пирински за секретар. Двајцата, како челни луѓе на Македонскиот народен сојуз секоја година ќе организираат конгреси, ќе издаваат весници и успешно ќе ја шират вистината за Македонија. Македонскиот народен сојуз со јасно дефинирана национална концепција, преку своите централни органи со кои соработуваат Македонци од сите делови на земјата, ја градат националната свест на Македонците каде и да се наоѓаат.

Во овој период како централен орган се јавуваат весниците: „Балканско сдружение“, „Трудова Македонија“, „Народна волја“ и др. Во нив се објавуваат сите важни документи, соопштенија, коресподенција со македонците било каде и да се, како и лични спомени од Илинденското востание  Овие весници ја пропагираат македонската вистина, а преку нив членовите на Македонскиот народен сојуз се борат на светот да му ја кажат правата вистина дека македонската нација е реалност.

Овие весници, меѓу кои и  „Трудова Македонија“, ги обединуваат Македонците од сите делови на поделената татковина и претставува верен сведок за нивната национална свест, идентитетот, како и за континуитетот и карактерот на ослободителните стремежи и државотворни идеали.

По договор со органот на Сојузот на БМРП клубови во САД в. „С’знание“, од 11 февруари 1938 година, издавањето на „Трудова Македонија“ продолжува како заеднички неделен орган под наслов „Народна воља. Narodna volya .Peuple’s will“, со истата национална платформа, но како весник на Бугарите и Македонците во Америка. Тое е еден добар пример за заедничка соработка на двата народи.