Тргни ја брате раката во која ножот го држиш за в грб да ми го зариеш, оти ќе шикне крв црвена и образот ќе ти го накаже па така бележан ќе шеташ светот да те прекорува и дури си жив не ќе можеш со ниедна вода да се измиеш и образот да си го обелиш.
Ај, појави се пред мене лице в лице да се сретнеме и очи в очи да се погледнеме, за да ти ја видам пизмата и да те прашам од кај ти е, кој ѓавол влегол во тебе та те закрвил против мене, а една иста мајка нè родила и аманет свет ни оставила да знаеме кои и чии сме.
Со исто млеко сме доени и во иста црква крстени, на исто огниште топлени и од иста земја хранети, и нели мајка нè учеше на иста страна да стоиме и по патот нејзин да одиме, за никој, нигде и никогаш да не може да нè раздели и родот наш да ни го закрви.
Р. Христовска, 08.02.2018 ("Оловни мониста")
|