Денес, 8 Септември, ја славиме независноста на Македонија, историски ден кога нашата татковина гордо застана рамноправно меѓу слободните народи на светот.

Овој ден е и празник и завет: потсетник дека токму ние, Македонците, ја носиме одговорноста да ја чуваме и зајакнуваме слободата за која толку многумина ги положија своите животи.

Утрово, Директорот на ОМД за Македонија и Европа, Гордан Јорданов, свечено положи цвеќе на вечните почивалишта на Претседателите Киро Глигоров и Борис Трајковски, како и на првиот Премиер Никола Кљусев. ОМД, исто така, учествуваше и на Свечената Академија по повод Денот на независноста во Македонската филхармонија, оддавајќи почит на сите кои го дадоа најскапоценото за нашата слобода.

Овој викенд, Македонците ширум дијаспората го креваат нашето знаме и го слават Денот на независноста во секој дел на светот. ОМД го одбележа овој голем празник со настани во Њујорк, Мајами и Малме, Шведска, моменти кои ја покажуваат нашата заедничка гордост, сила и посветеност кон татковината.

А најголемата прослава допрва доаѓа на 27 септември во Детроит ќе се одржи 20-годишнината на ОМД — Галата на единство, незаборавна вечер посветена на нашата заедница, нашето наследство и нашата иднина.

На овој ден да се потсетиме дека иднината на Македонија зависи од секој од нас, од нашето единство, нашата посветеност и нашата љубов кон татковината. Само така ќе обезбедиме светлината на независноста да свети уште посилно за идните генерации.

Среќен Ден на независноста!